السبت، 29 ديسمبر، 2007

ام محمد .....ومشوار حياة

اولا احب اوضح ان كل الشخصيات ها تبقي باسماء مش حقيقيه ،و الاحداث كلها حقيقيه بتصرف

بجد تعبت جدا علشان اختار انهي حكايه ابدأ بيها وبقالي يومين بفكر ابدأ بمين وفي الاخر قررت ابدأ بالحاجه ام محمد
هي حكاية طويله شويه ، معلش استحملوها ، حاولت اضغطها علي اد ما اقدر

كمان كنت محتاره اتكلم بالفصحي ولا بالعامية ؟؟ وبعدين قررت امزج بين الاتنين


--------------------------------


بداية معرفتي بام محمد لم تتعدي كونها حماة احد زملاء زوجي لا اكثر ولا اقل

كانت تمر من امام الصيدليه فقط ولا تدخل فقد كانت تتعامل مع صيدليه اخري
حتي جاء ذلك اليوم الذي دخلت فيه تبدو عليها علامات الانهاك والتعب
فجلست قليلا لتستريح من تعب المشوار وبالمره تشتري بعض الادوية والسرنجات لزوم حقنة الانسولين

فما كان مني الا ان رحب بها كعادتي مع اي شخص يدخل الصيدليه

اهلا ياحاجه ازيك اخبارك ايه وازي صحتك ان شاء الله بخير

في العاده يكون الرد مقتضب وقصير مثلا
الحمد لله او نحمد الله علي كل شئ او اهي ماشيه ...إلخ

اما في حالة ام محمد فلم يكن كذلك ، فلقد اخذت في الحديث باسهاب عن مشاكلها الصحيه
ومتاعبها مع مرض السكر ومايسببه لها من مشاكل في عينيها

تقريبا ماصدقت حد يفتحها في الكلام فارمت كل اللي فقلبها عليه

وكالعاده تركتها تتحدث كما تشاء ولم اقاطعها سوي بكلمات معدوده

معلش ياحاجه ، ان شاء الله يجيب الشفا من عنده ، ربنا يخفف عنك ....وكده يعني

وبعدها لم تكف ام محمد عن الكلام طوال التسع سنوات الاخيره فكلما جاءت اليّ اجد لديها
الجديد او حتي القديم الذي اصبحت احفظه عن ظهر قلب

فهي مطلقه علي مشارف السبعين من عمرها ولديها ابنان ( شاب وفتاه)
من اسره ميسورة الحال جميعهم تقريبا بدأوا من الصفر حتي وصلوا لما هم فيه
اما هي فلم تستطيع ان تتجاوزه ولو بامتار قليلة
( اقصد الصفر)

كانت في شبابها آية في الجمال الباقي في ملامحها بالرغم من تقدم العمر
وكانت دائما ما تؤكد علي ذلك حتي انها احضرت بعض الصور ذات مره لاراها

شوفي يادكتوره والله كنت زي القمر ( وبصراحه فعلا كانت جميله جدا جدا ) ، العرسان كانوا بيتقدموالي بالطوابير

ثم اخذت تحكي لي حكايتها من البداية

انها كانت غايه في الجمال وكان كل من يراها يعجب بها ويطلبها زوجاً له

بس زي مابيقولوا الجميله اوي دايما حظها قليل

في بداية حياتها تزوجت من رجل ثري ولكنها لم تستمر معه اكثر من سنه ثم طلقها ،لانها لم تنجب له ولي العهد المنتظر

الناس بقوا يقولوا ان العيب مني واني مش بخلف ، وكمان بقيت مطلقه وفرصي
في الجواز قلت


ثم تقدم للزواج بها رجل متزوج من اخري وله منها ابناء ، ولكنه كان علي خلاف معها وصل الي الطلاق وعلي مايبدو -تأكد هذا فيما بعد -انه كان يريد ان يثير غيرة الاخري بها

قال اني فرصه مطلقه ومش هادق معاه وكمان مش بخلف يعني لما يعوز يسيبني هايسيبني براحته من غير التزامات

ولكن يشاء السميع العليم ان تحمل منه في اول شهر لزواجهما وتنجب ابنها الاول ،
مما اثار حنق زوجها وثورته عليها

اتهمني ان الولد مش ابنه ، كان عاوز يعمل اي حاجه علشان يسبني خصوصا انه كان بدأ
يتصالح مع مراته الاولانيه
بس ربنا كان عاوز ينصفني ، الولد طلع حته منه

اضطر للعوده اليها علي مضض متحينا الفرصه لتركها الي الابد ، ولكن ايضا جاءت الرياح بما لاتشتهي السفن ، فقد حملت ثانياً بعد ولادتها بشهر واحد لتنجب اخت لابنها

كل ده ماشفعليش عنده ، برضو رماني ورجع لمراته الاولانيه من غير ما يسأل عليا ولا علي ابنه وبنته اللي كانت لسه ماتمتش شهر ، وبعد كام شهر بعتلي ورقة الطلاق

في هذه الفتره كان والدها مايزال علي قيد الحياه ، وهو من تولي الانفاق عليها وعلي
اولادها - فهي طبعا لا تعمل ولم تكمل تعليمها - حتي حصلت علي نفقه لاولادها من ابيهم
لا تتعدي 3 جنيهات شهريا

ابويا كان دايما يقولي ماتخافيش طول مانا علي وش الدنيا ،

لما مات اتلطمت من بعده و شفت المرار،
الله يرحمك يابا

بعد وفاة والدها ذاقت الهوان حتي من اقرب الناس لها ، اخيها ، الذي لم يرحمها
واستولي علي مصاغها ونقودها لاكمال بناء بيته ثم طردها منه مؤخرا لتقاسي في شقق الايجار الجديد باهظة الثمن بالنسبة لها

كما انه كان دائم التهكم عليها وعلي اولادها ، حاول بشتي الطرق ان لا يكمل ابنها تعليمه حتي يفشل في حياته ولايكون مثل اولاده


عملت ام محمد في اكثر من مهنة ، خياطه ، دلاله تبيع الملابس الجاهزة بالقسط
فتحت بقاله صغيره عباره عن فاترينه بسيطه اما م بيتها ،

لم تترك اي مصدر شريف للرزق الا وسعت فيه

عاشت ام محمد طوال 32 عاما تقاسي من اجل تربية اولادها وتعليمهم ، حتي اصبح الشاب محامي ( للحق بدأ في وضع اقدامه علي اول سلم النجاح ) والبنت مدرسه


عرفت منها ان طليقها هذا يمتلك سوبر ماركت وعماره 7 ادوار في مدينة نصر
وانه لم يساعدها ولو بجنيه ولم يفكر ايضا في رؤية اولاده طوال 25 عام

اخويا وطليقي كانوا دايما يعايروا ولادي انهم تربية مَرَه ( آسفه علي اللفظ بس هو بيتقال كده )

وان ابني عمره ماهاينجح في حياته

ابني اللي كان في الثانوي والجامعه بيشيل القصعه علي كتفه طول الصيف
علشان يحوش مصاريف الدراسه

ابني اللي الدكتور سقطه علشان ماشتراش المذكره اللي ماكانش معاه تمنها

وبنتي اللي كانت بتشتغل طول سنين الجامعه مندوبة مبيعات علشان تصرف علي نفسها

بعد كل المرار اللي انا شفته في الاخر ولادي بقوا احسن من ولاده اللي منهم المدمن ومنهم الصايع ،

ولادي اتعلموا احلي علام واشتغلوا وربنا فتحها عليهم من غير ما ابوهم يشوفهم ولو
مره طول عمرهم

ولما اتخرجوا وبنته جت تتجوز عرف ان ليه ولاد وجاي يسأل عليهم

ما صرفش عليهم مليم مع انه مبسوط وربنا ساترها معاه وحتي لما بنته جت تتجوز
ما دفعش مليم في جهازها

حكت لي ايضا ان طليقها قد اصابته امراض عدة من بينها ضيق في الشريان التاجي ويحتاج لعملية كبيره في القلب و يخشي علي نفسه ان يتوفي خلالها

حاليا تعاني ام محمد من ضعف شديد في نظرها كما انها فقدت القدره علي الابصار باحدي عينيها ، بسبب مضاعفات مرض السكر اللعين ، توقفت عن العمل ، وتكتفي بمعاش ابيها الذي لا يتجاوز 150 جنيه يضيع معظمها علي الادوية ، تعيش مع ابنها الوحيد في شقه متواضعه ، وكل املها في الحياه ان تطمئن علي ابنها وتزوجه من بنت الحلال التي تقبل ان تتحملها الايام القليله الباقيه من حياتها ،

نفسي اشوفه متهني مع عروسته واشيل عياله

و ان تزور بيت الله الحرام وتضع يدها علي شباك البني الغالي

نفسي اروح عند النبي يا دكتوره ، احج ولا حتي اعمل عمره المهم اروح
أروح ان شاء الله علي ضهر جمل







هناك 50 تعليقًا:

عصفور المدينة يقول...

برضه اول تعليق انا زهقت بقى
:)
ربنا يبارك فيك يا دكتورة القصة رائعة وفيها الكثير من الفوائد نفع الله بك

حقيقة ممكن أركز على دور المجتمع الفائب الذي يغفل كثيرا عن مساعدة المحتاجين
ولكن كيف وأقرب الناس أصلا يتخلى عن مسئولياته
ولكن الله لا يغفل ولا يهمل
وحتى ولولم يصب ذلك الرجل بالأمراض ويفشل في التربية فعند الله توفى كل نفس ما عملت

الفتاة الجميلة (بزيادة) أحيانا يحصل خطأ في أمر زواجها يتمثل في المسارعة بزواجها أو التأخير والتمنع وهذه مشكلة فعلا مشاهدة

دكتور حر يقول...

حظك بس يا باشمهندس محمد
لحقته على ما قرأته

********
ربنا يكرمك يا دكتوره عالقصه دي
دي واقع كتير بيتكرر

وغالبا بيحصل في الدول اللي بره كتيير قوي لأن العلاقات عندهم بتكون كده

لكن الفرق عندهم ان الحكومات بترعى الكل مش اللي بيشتغل فيها وبس

مش عارف اقول ايه
لكن جه على دماغي وانا أقرا القصه موضوع الاختيارات والتوفيق في الزواج
وموضوه
لمن كان له قلب
ان الواحد يكم قلبه مع الغريب والقريب على حد سواء
ربنا يفكها عنا جميعا

دمت بكل خير

يوميات عيل مصري يقول...

الله عليكي
ده بالضبط اللي الواحد كان بيدور عليه
تعرفي يا دكتورة، محتاجين حد يطبطب، ومفيش مانع يدلع كمان، ما هو الناس محتاجة الطبطبة، أو على رأيك محتاجة الفضفضة، من زمان ما دمعتش، بس الحكاية في مليون بيت، والناس أصيلة أوي
تسلم ايديكي يا دكتورة، من زمان ما قرتش حاجة حلوة كده
ربنا يحفظك يارب

أسامة أبوالخير يقول...

تحياتي دكتوره يكفيني أن أقول لا تزال الحياة بخير مادامت فيها قلوب رحيمة كقلبك سعيد أن تشاركي في عرض مثل هذه الحيالات الإنسانية فعلا قلوب رحيمة...على طول الحياة

كرم مسلم يقول...

السلام عليكم

لا أجد الا ان أقول سبحان الله

ولو على ضهر جمل

صريح أوي يقول...

HAPPY NEW YEAR

كل عام وانت إلي الله أقرب وعلي طاعته ادوم..
تقبل الله منا ومنكم

مدوناتك جميلة جدا وهادفة جدا
ده لاني صريح جدا
عصفور المدينة زهقان وانا زعلان
لأني اكتشفت المدونة دي متاخر

مناجاة يقول...

ربنا يكرمك يارب قصتك هادفة وفيها معاني

احلى حاجة انها كانت بتتعامل مع صيدلية تانية واللي جذبها عندك حسن استماعك ليها
مجرد السماع ريحها

طريقة حلوة لجذب الزباين استغليها وطوريها
:)

رفقة عمر يقول...

قصتها محزنه قوى لاحول ولا قوة الا بالله
ربجد نفسى اعملها اى حاجه بس مش عارفه ايه ممكن يسعدها وهى خلاص قضت حياتها كلها فى شقاء ياريت نقدر نساعدها حتى تروح عمره لو امكن يعنى
ربنا يكرمك يادكتور
على صبرك لسماع حكايات محزنه ذى دى
جعلها الله فى ميزان حسانتك
من خفف على مسلم كربه فرج الله عليه كربه من كربات يوم القيامه

البنت الشلبية يقول...

جزاك الله خير يا دكتورة على طيبة قلبك
واضح ان القصص كلها هتبقى مأساوية لكنها حلوة ونتعلم منها حاجة
وانا اتعلمت حاجة مهمة من القصة دى
ان البنت فى مجتمعنا سواء حلوة او مش اوى حقها مهضوم سواء من اهلها وبالذات اخوتها الرجالة او من الزوج او الطليق
ومن هنا واجب على كل اسرة تحرم الدين والاخلاقيات انها تحافظ على حق بناتها من صغرهم
يعنى تأمنلهم مستقبلهم من الصغر عشان ميجيش اخ او زوج بعد الوفاة يرميها ومتلاقيش مكان تعيش فيه
البنت زى الولد كلهم لحم واحد من نفس الاب والام
ليه نفرق بينهم!!!!!

ربنا يرزق الحاجة ام محمد بحجة او عمرة يارب

بت خيخة وأى كلام يقول...

خمسة فضفضة
مبروك على المدونة الجديدة
ولو انى معرفش ليه عملتى اساسا مدونة جديدة
بس عموما القصة دى
تعليقى الوحيد عليها
الحمد الله الحمد الله الحمد الله
انا لو قعدت احمد ربنا من دلوقتى لحد بكرة عشر سنين جايين مش هايكفى انى اشكره على كل النعم اللى ادهانى
انا طلع عندى حاجات حلوة كتيير اوى وماكنتش واخدة بالى منها
ولما بشوف قصص زى قصة ام محمد
بحمد ربنا اوى على اللى انا فيه
حكايتك دى خلتنى ابوس ايدى وش وضهر
شكرا ليكى يا فضفضة

اختك خيخة

mohand يقول...

السلام عليكم
قصصص توجع القلب والله
بس يا دكتوره الشكل العام للمدونة والصورة اللي فوق متتناسبش خالص مع القصص دي
:(:(:(:
بس عايز اقول ان تربية المره
بتكون في اوقات كتير قوي احسن من تربية ميلون راجل من عينه الاخ
دا هيشوف ايام سوداء
ربنا مبيسبش حد

تحياتي

مهندس مصري يقول...

انتي حتنافسي بريد الجمعة في الأهرام يا دكتورة بالمدونة دي
انتي عندك صبر تسمعي ده كله
دا كل واحد فيه اللي مكفيه و زيادة
ربنا يكرمك يا دكتورة زي ما بتسعدي الناس بإنك تسمعيهم و تطبطبي عليهم

أما الأخ ده فلو كان متربي من أبوهم كويس و يعرف ربنا ما كانش عمل كده

و طليقها اهو ربنا بيجازيه في الدنيا و لسه عذاب الآخرة

ام البنات يقول...

خمسه فضفضه
اظنك لديك الكثير واظن ان الله رزقها بمن يستمع اليها مثلك يا اختاه
حتى تزح عن كاهلها قليل
وحتى نعلم ان الله لا يضيع اجر من أحسن عملا
وانه لا يستوى الظالم والمظلوم
متابعين
ولكنى بينى وبينك كل تدوينه هتحسسنا بالتقصير تجاهمم
والله اوقات بعيط من عجزى عن مساعدة كل واحد اسمع عنه
ربنا يقدرنا جميعا"

Gid-Do - جدو يقول...

يوجد فى مصر الكثيرات من السيدات الاتى تولين وحدهن مسئولية اعالة الاسرة وتربية الابناء بعد وفاة الزوج او بعد الطلاق او حتى بعد طفشان الزوج ـ ويوجد ايضا الكثير من البنات فى نفس الموقف بعد ان ترك لهن الاب مسئولة تربية الاخوة والاخوات ـ وبطبيعة الحال بيقاسوا الامرين فى حياتهم ـ ويحضرنى الان حكاية ارجو ان تطبق فى مصر خاصة بعد ان حل الرقم القومى محل البطاقات الورقية ـ

اردت ان اجدد جواز سفرى الامريكى فوجدت ان استمارة التجديد موجودة على الانترنت ويمكن كتابة البيانات على النت ثم طبع الصفحة وارسالها الى الجهة المختصة لاستخراج الجواز ت وكان من ضمن التعليمان ان اى شخص متخلف عن سداد نفقة اطفالة لايستطيع تجديد جواز السفر ـ لان الرقم القومى الامريكى الى لابد من استخراجة لكل مواطن اعتبارا من يوم ميلادة ـ على خلاف مصر اللى بيكون من سن 16 سنة ـ يوضع على استمارة جواز السفر ومنه راح يعرفوا اذا كان الشخص علية حكم نفقة لاولادة

والحكومة هنا فى امريكا وعن طريق الرقم القومى بتتصيد هؤلاء الرجال بطرق كتيرة عن طريق الرقم القومى ـ تحياتى

YHYيــوســف الـمصـرى يقول...

السلام عليكم ورحمة الله وبركاته
...........................
ازيك يا دكتورة اولا كل سنة وانتى طيبة وعام جديد سعيد عليكى ان شاء الله

المدونة الجديدة بجد مسك الختام للسنة 2007
وبداية جميلة لبداية 2008 وبدأت بأم محمد ...
صراحة القصة فيها كذا قصة وكل قصة ليها بعد انسانى وعبر نتعلم منها

بما انك صيدلنيه وبيخش عليكى كل يوم زباين اشكال والوان .على رأى اغنية احمد عدوية (وشوش الناس حكايات ) متهيقلى انتى بتشوفى فى كل وش حكاية وقصة ..الناس بقت فعلا حكويهم بينة على وششهم .. والله لما بركب المترو الصبح بدرى الف على وشوش الناس والله بحس انها بتتكلم من غير السنتهم ما تتكلم ..
معلش بعدت شوية عن بطلتنا ام محمد ولو سمحت انا هركز على جملة واحدة وانتى اعتذرتى على اللفظ فيها وهى (تربية مره )
كل من مات ابيه وهو فى سن صغير يعرف
الكلمة دى كويس ويعرف اد ايه الام متبقاش خايفة من حاجة اكتر من انها يتقلها الكلمة دى .....نصيحة لأى شاب صغير مات ابوه... وأمه هى ولية امره ..لا تسمح لأحد ان يقتل أمك بهذه الكلمة جاهد لكى لا تسمعها فأنها مؤلمة وتقتلها ألف مرة نجاحك فى حياتك هو سكين على لسان اى شخص يحاول ان ينطقها

...........
بجد يا دكتورة المدونة اكثر من رائعة وانا متوقع قصص وحكايات وابطال نتعلم منهم ونضحك ونبكى معاهم
وأجمل ما فيها انها من واقع الحياة الى عيشنها
وجزاكى الله كل خير
تحياتى

Dr Emad يقول...

والله المدونه دى تحفه
وباذن الله تبقى اجمل مدونه فى 2008
اجمل حاجه فيها انك بتشممينا ريحه الناس الجمال بتوع زمان
بنشم ريحة تراب مصر

بالنسبه للبوست بقى

تحفه

الكلام زى ميكون طالع منها
انت سجلتيلها
ولا افتكرتى ده كله

اسلوبك عيشنى فى القصه


وربنا يحققلها احلامها
وتحج


يااااارب

عبدٌ من عباد الله يقول...

لا أجد ما أقول بالنسبة لحالة السيدة الفاضلة أم محمد
خاصة وأنى أعرف البعض فى حالات مشابهه
قد لا تصل لحالة السيدة الفاضلة أم محمد
أعانها الله و يسرلها و بارك فى أولادها و أعطاها ما تتمنى و زياده

إنـســـانـة يقول...

لا حول ولا قوة الا بالله العلي العظيم

يمكن ربنا خلاكى تحكيلنا الحكاية دى عشان كل واحد مضايق وزعلان فى حياته يحمد ربنا ويشكره على فضله

ربنا يكرمها ام محمد ويجعلها من اهل الفردوس الأعلى اللهم آمييين

أحمد سلامــه يقول...

تلخيص ول ااروع ولا اجمل
والله ممتاز انا مش ناسي اسلوبك من ساعة قصة اشجار الكورنيش اياها
:)
مشوار حياة فعلا وده فهمنى اكتر عنوان المدونة
تسلم ايدك والله

Desert cat يقول...

كل سنة وانتى طيبة يا دكتورة
وان شاء الله ربنا يكرمها بزيارة بيته ويحقق لها ما تتمنى بحق ما اكرمت ولادها وحفظتهم

سها يقول...

عارفة حكاياتك دي فكرتني باغنية لمدحت صالح قديمة (ماهو الجديد مايتسمعش) بتقول

ولا تسوى دموع وسفر ورجوع ولا تحلى الدنيا الا بناسها
طب ليه نحتار بالميت مشوار ما تسيبوا قلوبنا لاحساسها

الناس والعلاقات بين الناس
اكتشفت انها حاجة مهمة فوق ما باتصور
احساسي بالناس
اعتقد هو المقياس اللي بيحدد درجة ادميتي

ربنا يباركلك ويقدرك على مساعدتهم
والمساعدة مش بس مادية او عينية
كفاية مقابلتك الكويسة واستماعك ليهم باهتمام حقيقي واحساس صادق وصدر رحب

يوميات عيل مصري يقول...

دكتورة ما تنسيش تزورينا الخميس الجاي بالليل لأن هينزل آخر تدوينة ونقفل المدونة خالص
كل سنة وأنتم طيبين

عاشقه الفردوس يقول...

ايه ده ماشاء الله بجد تدوينه جميله
ربنا يباركلك فيها
يااااااااااااااه خدى من ده كتييير فيه قصص من دى بالهبل

بجد المصريين وخصوصا لستات بيقاسوا والله

ربنا يجعله فى ميزان حسنات ام محمد

ويارب تحج باذن الله السنه الجايه
يارب

david santos يقول...

Happy new year!!

لماضة يقول...

دايما انا جايه متاخره
الاول كل سنه وانتى طيبه يا ست الكل
الست ام محمد دى مثال لامهات كتير نفسى البنات الصغيرين او المقبلين على الزواج يحتذوا حذوه
على قد ما فى حكايتها مراره
على قد ما اصرارها حول المراره دى لشىء جميل
تحياتى لحضرتك وفى انتظار باقى خط الحياه

مستجدة يقول...

السلام عليكم ورحمه الله وبركاته
الله يباركلك يا استاذنا متقفلش المدونه...أينعم انا مستجده ومباليش كتييير معاكو بس انا قريت فى مدونتك كتير اوى يمكن اكتر مدونه قريت فيها والله ومش هتصدق لو قلتلك انى ببقى سعيده وانا بقرا فيها بجد لانها مدونه مختلفه وبحس بجد انى قدام طفل بيحكيلى عمل ايه النهارده وبتخيل معاك كل موقف فياريت ربنا يقدرك ومتقفلهاش حتى لو حضرتك مش فاضى الفتره اللى جايه سيبها مفتوحه نقرا فيها كفايه انها بترجعنا لأيام كان نفسنا كلنا نعيشها وكفايه ان احنا معشنهاش ف متحرمناش اننا نتخيلها معاك
وربنا يوفقك وتمنياتنا بدوام النجاح
سلااااام

مستجدة يقول...

اعتذار وتعليق
السلام عليكم يا دكتوره
أولا: انا اسفه نشرت تعليق كان ل "عيل مصرى" عندك بالغلط واعتذر عن هذا
ثانيا : مبروك على المدونه الجديدة وان شاء الله تكون احلى من اللى فاتت
ثالثا : اثرت فيا اوى القصه دى والله فى ناس عايشين حواليا أغلب من الغلب نفسه واسو كتييييير جدا فى حياتهم بس اكيد ربنا مبينساش حد ولو احنا نسيناهم ربنا مبينساهمش ولو حقهم اتاخد ربنا وحده اللى بيرجعهلهم وان شاء الله ربنا يجعله فى ميزان حسناتهم واكيد ربنا عارف انهم كانو هيستحملو الظروف دى وعشان كده صمدوا للنهايه" لا يكلف الله نفسا الا وسعها" صدق الله العظيم
بحييكى يادكتوره على القصه دى وبحييى ام محمد وربنا ان شاء الله يكتبلها زياره بيته الحرام ويجازيها خير عن اللى شافته هى وكل اللى زيها.......وربنا يكرمك يادكتوره ويوفقك.....اميين
سلاااااام

د/أحمد الجويلى يقول...

تسلم إيدك يا دكتورة ..
كلامك يمس القلب من جوه ..

أنا أخوكى د/أحمد الجويلى
و عامل كتاب اسمه
يوميات
صيدلى
مفروس
فى الأرياف

http://www.4shared.com/file/26352995/3a0bf12e/___online.html

و قريبا الجزء التانى منه

مليانين حكايات واقعية برضه زى اللى انتى بتحكيها دى .. بس طبعا إحنا مش قدّك

نفسى تقرى فيه اللى تقدرى عليه و تبقى تقولى لى رأيك على منتدى الديفيدى أو حتى تسيبى لى كومنت على الفورشيرد أو البلوج بتاعتى

أخوكى / الجويلى

ody911 يقول...

ربنا ينولها كل إللى بتتمناه


يارب


بلوج هايل يضاف لمجموعتك

ويارب تكونى بخير

وكل سنه وإنتى طيبة



أودى عادى برضو

شيكابالا يقول...

دكتورتنا العزيزة اولا ميرسى على ردك عليا وعاوزة اقولك حاجة ف سرك انا زملكاوية بس بجد من ايام العزمش دلوقتى المهم الحاجة ام محمد نموزج قوى للمراة الضحية فى مجتمعناالرجالة يعملوها دايما ويخلعو والستات هيا اللى بتستحمل وبتشيل حسبى اللة ونعم الوكيل ف كل واحد يظلم واحدة ست

فرنسا هانم يقول...

تسلمى يا دكتوره
وتسلم حكاياتك
بس تصدقى النوعيه دى موجوده فى العماره معايا
مع الاختلاف فى المكان والزمان
نفس الحكايه
بتبداء تحدث
مشاكل مع الزوج والزوجه ادت الى الطلاق
ومعها اطفال
ولايريد زوجها ان يعطيها شىء
وبرضه جميله
وبدءت تعمل من اجل اطفالها
هل من الممكن اننا نرى احداث اليوم من المستقبل

الراقص مع الذئاب يقول...

السلام عليكم ورحمة الله وبركاته
كتيرة اوي قصة ام محمد ومكررة
سبحان الله...الناس مبتتعلمش من الغلط
والحكاية صورة بكربون من الف حكاية وحكاية
لكي الله يا ام محمد
رزقك الله ورزقنا حج بيته الكريم


جزاكي الله خيرا يا دكتورة فضفضة

إخوانى مخربش يقول...

وبعد كل ده يا دكتور

بتقلولى ما تشتغلش فى صيدله ليه

انا كان قلبى بيتقطع كل يوم من الحالات دى

Doba يقول...

الأول بسم الله ماشاء الله على الهبة اللى ربنا مديهالك وهى الاستماع والتخفيف عن الناس لان قلما يكون فى هذا الزمان من يمتلكون هذه الموهبة من الله

ثانيا وعلى الرغم من العبر الناتجة من القصة بس اصل فيها تشابه مع استرى فى بعض نقاط

انا بابا توفى وانا عندى سنة ونص وماما هيه اللى ربت لوحدها خمسة من الاطفال انا اصغرهم والكل كانوا بيقولو ان كلنا هنطلع بايظين واننا مش هنكمل تعليمنا بس بفضل الله وتعب امى انا معايا ليسانس آداب واخويا محامى واختى مهندسة واختاتى التانيين بكاولريوس تجارة

ومش قادرة اقولك ان الكل ولادهم دلوقتى ما بيننا عاملين ايه احنا منوريين فى عيلتنا وامى مطلعانا بنحب بعض جدا وهما ماليهم الغل والحق لعبضيهم

الحمد لله على كل حال
واللى معاه ربنا يبقى ملك كل حاجة

لكى منى كل دعائى بالتوفيق دايما
وربنا يخليلك اسرتك الكريمة

تحياتى
هبة

الفاتح الجعفري يقول...

بجد قصه مؤثره جدا يادكتوره
في حديث للنبي عليه الصلاة والسلام يقول الظلم ظلمات يوم القيامه
فعلا اللي بيظلم ده لو عارف عاقبه الظلم كان يتمني ياكل التراب ولاانه يظلم
والست دي ان شاء الله ربنا يجزيها كل خير ويرزقها الجنه ويبارك في اولادها
الحمد لله الذي عافانا مماابتلي به كثير من الناس وفضلنا علي كثير ممن خلق تفضيلا

الحشرى يقول...

بصراحة موضوع يشد وممتاز

بس دى سنة الحياة

مفيش حد بيبقى عاجبه عيشته ودايماً بيتمرض عليها وكمان بييجى الزمان عليه

ربنا يكون بعونها وينولها زيارة حبيبك محمد صلى الله عليه وسلم

نقطة مية يقول...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

shahy يقول...

الله عليكي يادكتورة الله
جزاكي الله كل خير
نحن في انتظار باقي الاحداث على طول الحياة

د/اجدع بنوته يقول...

يااااااااه وادى اول حكايه

تعاطفت معاها جدا جدا

ايه كمية الظلم والقهر اللى مرت بيهم دول

م زوج يطلق لزوج اخدها محطه لتلطيم وشقا

ده ايه القهر اللى م كل ناحيه ده

بجد ربنا يقويه يارب وينولها زيارة الرسول عليه افضل الصلاة والسلام

وقد ايه كان اسلوبك هايل يادكتورتنا
بجد رسمتيلى بكلماتك ملامح لتيته ام محمد ومأساتها .. تصوير افتراضى هايل

ويتنج الحكايه الجايه

تحياتى ولو مفهاش ازعاج تبلغى تحياتنا للحاجه ام محمد

شكرا

A.SAMIR يقول...

يااااااااااااه
هو لسه في الدنيا ناس كدة؟
ناس مكافحة بالشكل دة؟ وصبورة الصبر دة؟
وناس زي طليقها فيهم كل الخسة والندالة وقلة الاصل دي؟
معقول في كدة؟
عموما زي ما قلت لك
الصيدلية هي منتدى المرضى
تحياتي واحتراماتي

doha يقول...

حلم كتير من الناس الغلبانة
يادكتورة
انهم
امنيتهم يفرحو بعيالهم ويزورو حبيبهم
وربنا يوفقك لعمل الخير دايما
وكل سنةوانتى طيبة

nonoymm يقول...

ياااااااااااااااااااه
والله مش عارفة اقول غير الله يؤجرك ويكرمك خير يا ام محمد ويكرمك بحج بيته الحرام ويرزقك الفردوس الاعلى يا رب
ويكرمك يا اختي وعارفة بانصاتك بس للناس الكبار دول بيرتاحوا اوي لما يلاقوا حد عاوز يسمعهم اساليني انا عن تجارب
وللاسف واقعنا الاليم وطبعا ظلم العباد للمستضعفين هو اللي وصلنا لكدة وحسبي الله ونعم الوكيل في الظلمة

مصعب يقول...

مش عارف أقول أيه

أقول تسلم إيدك على البوست الرائع
ولا أقول أنا حزين على حال كتير قوي زي أم محمد ؟

مش عارف
لكن عموما
من قال لأخيه : جزاك الله خيرا فقد أجزل له في العطاء
حديث

جزاكم الله خيرا
والسلام مسك الختام

تائهة فى أرض الأحلام يقول...

رغم انها قصة مؤثرة ولكن هاتلاقى زيها فى كل شارع من ارقى حتة فى مصر لاكترها شعبية
وفى الآخر جايين يقولوا ان شغل الست حرام وان الستات مابقتش زى الاول
ماهو اصل الرجالة مابقاش ليها نفع زى الاول برده

فان كنتم تريدون نساءا حقا فكونوا رجالا على حق

قصة جميلة
تحياتى لك

يوميات عيل مصري يقول...

السلام عليكم دكتورة
ام محمد طولت في القعدة هو مقيش زباين تاني

el_assel يقول...

ههههههههه
والله اللي يعيش ياما يشوف

فعلا ام محمد مثال للأم المصرية المكافحة
وربنا مابينساش عبيده
الكويس منهم والوحش
كله بياخد حقه

واللي بيعمل حاجة بيلاقي جزاءه شبها


ربنا ينصر كل مظلوم
وربنا طبعا قادر علي كل ظالم



سلاماتي

خمسة فضفضة يقول...

السلام عليكم ورحمة الله وبركاته


باشمهندس عصفور المدينة
دكتور حر
ابوفداء "عيل مصري "
اسامة ابو الخير
كرم مسلم
صريح اوي
مناجاة
رفقة عمر
البنت الشلبية
بت خيخه
مهند
مهندس مصري
ام البنات
جدو
يوسف المصري
د/عماد
عبد من عباد الله
انسانه
د/احمد سلامه
قطة الصحراء
سها
عاشقة الفردوس
david santos
لماضة
مستجدة
د/،احمد الجويلي
اودي
شيكابالا
فرنسا هانم
الراقص مع الذئاب
اخواني مخربش
دوبا
الفاتح الجعفري
الحشري
نقطة مية
شاهي
د/اجدع بنوته
د/احمد سمير
ضحي
نونيم
مصعب
تائهة في ارض الاحلام
الاصيل

شكرا لكم جميعا علي تعليقاتكم الجميله اوي ده وتفاعلكم الرائع مع القصه ، بجد والله اثلجتم صدري و اديتوني دفعه كبيره اوي اني اكمل باقي الحكايات ويارب الباقي يعجبكم

بالنسبة لحكاية الحاجه ام محمد طبعا مش دي الوحيده من النوعيه دي ، في زيها كتير اوي في مصر ويمكن كمان حالات اكتر شقاء من كده ، بس هي ام محمد بقي اللي اعرفها وحكيت حكايتها كمان هي اكتر حد اعرفه من النوعيه دي حكايته اثرت فيا يمكن لاني اعرف تفاصيلها وكل صغيره وكبيره فيها من حكايات ام محمد ليا ، واللي اختصرت كتير اوي منها ، ام محمد عيشتني سنين عمرها اللي فوق الستين يوم بيوم وساعه بساعه مافيش حاجه ماحكتليش عليها ، ولو ينفع كانت ممكن تاخد مدونه كامله ليها ولحكاياتها ، مارضتش اطول الحكايه اكتر علشان متملوش وتزهقوا

وبالرغم من كل المعاناه والظروف اللي عايشه فيها الا ان نفسها عزيزه جدا وبترفض اي مساعده من اي حد ، ولما بحاول اني اديها حاجه مش بترضي وبتطلع عيني لحد ماتخدها حتي الخصم علي الادويه اللي تلاقي الناس داخلين وبعين قويه يطلبوه هي مش بترضي فابضطر اني اعمله من وراها ساعات

ربنا يكرمها ويقر عينها باولادها ويرزقها حجة لبيته الحرام

كل سنة وانت طيبين جميعا
وشكرا مره تانيه علي النفاعل والتعليقات الجميله

david santos يقول...

Santos
Hi
A beautiful place here!
Excellent post! You are Master.
Thank you.
have a good day

غير معرف يقول...

ربنا يبارك فيك يادكتورة ماشاء الله عليك أسلونك حلو أوي و شيق وممتع والمواضيع الي بتختاريها هادفة تابعي جزاك الله واحنا مستنيين الجديد دايما.

غير معرف يقول...

ياسلام عليك عظمة على عظمة يا دكتورة