الجمعة، ٢٢ فبراير ٢٠٠٨

صابر يا استاذ صابر





بطل حكايتنا هذه المره رجل ، الاستاذ صابر رمضان

والاستاذ صابر يعتبر من الشخصيات المتعبه جدا في التعامل معها او هكذا يبدو لك عندما تتعامل معه للمره الاولي
في البدايه كان يرفض التعامل معي ، ودائما يسأل عن الدكتور سعيد الصيدلي الثاني الذي يعمل معي ، فاذا لم يجده ينصرف في هدوء دون ان يشتري حتي قرص اسبرين

كنت اغتاظ بشده واشعر في هذا التصرف بإهانه بالغه ،كنت اعتبره لا يثق بي كصيدلانيه
عندما كنت اعرض عليه المساعده كان يعتذر

معلش يا دكتوره ، د/ سعيد عارف حالتي وعارف طلباتي ، هابقي اجيله ، سلام عليكم

بصراحه عندما كنت اراه يركبني ميت عفريت

ولكن ............هذا الاحساس تبدل مائة وثمانون درجه بعد ان عرفت حكايته ، وذلك بعد سفر دكتور سعيد للعمل في السعوديه ولم يعد امام الاستاذ صابر الا انا لتلبي طلباته

انه يعمل في شركة المنسوجات القريبه ، تجاوز الاربعين ولكن هيئته توحي بانه قد تجاوز الستين ،يتحرك بصعوبه بالغه فهو لا يستطيع ان يتحكم في حركة يده ورجله اليمني ، لديه شبه شلل بهما ،
اخوه هوه الدكتور احمد رمضان احد اشهر واغني اطباءالاطفال في المدينة

وبحكم مروره يوميا امام الصيدليه كان يدخل ليشتري طلباته و يستريح قليلا
كان دائما يطلب اقراص للصداع ، ويسأل دوما عن الجديد


ها يا دكتوره عندك ايه جديد

مافيش جديد للصداع ، طيب ايه الجديد عندك في الفيتامينات ، طيب اديني حاجه مهدئة بس مش قويه ،وريني النشره كده ،


كان يعلم كل صغيره وكبيره متعلقه باصناف كثيرة جدا من الادويه ، ويحرص علي قراءة النشرات الطبيه المرافقه للدواء قبل شرائه ولو وجد اي عرض جانبي لا يعجبه يرفض الدواء فورا حتي لو كانت نسبة هذا العرض واحد في الالف

اما اذا كانت النشره المرفقه بالانجليزيه فهذا الدواء مرفوض يا ولدي مرفوض حتي لو به اكسير الحياة
اي صنف يؤثر علي المعده او الاعصاب او العضلات من قريب او من بعيد لا يقبله


من الآخر كده يا جماعه هوه كان ليه كام صنف ماشي عليهم بس لازم يعد يفتح النشرات ويقراها ويقلب الصيدليه اكنه بيقلب في سوق الكانتو وبعدين يشتري الاصناف اياها ويتكل علي الله ، وده بقي كان بيموتني من الغيظ وكل شويه يقولي

الدكتور سعيد كان عارف حالتي ، انا كنت حاكيله بالتفصيل

مش عارفه كان بيصبر عليك ازاي ، الله يكون في عونه وعوني ( في سري طبعا)



المهم بعد تردد طويل قرر الاستاذ صابر ان يحكي حكايته التي جعلتني اشفق عليه ،

كانت حياته طبيعيه جدا الي ان قرر له الاطباء اجراء عملية اللوز واللحمية ولا يخفي علي احد ان هذه العمليه سهله جدا اسهل من شكة الدبوس

بس قليل البخت بقي ها اعمل ايه نصيبي ، الحمد لله


كان خطأ طبيب البنج الذي اعطاه جرعه عاليه ولا تتناسب مع حالته ،مما ادي الي دخوله في غيبوبه لمدة ثلاثة ايام ، وكان الجميع يتوقعون وفاته ،

الحمد لله ربنا كتبلي عمر جديد

جرعة البنج الزائده ادت لحدوث مشاكل عدة من بينها ان التنفس توقف لفتره مما ادي الي حدوث خلل بوظائف المخ ،وبالتالي عدم قدرته التحكم في الجزء الايمن من الجسم ، لذا فهو يعاني من شبه شلل في يده ورجله اليمني

كما انه يعاني من صداع مزمن ، وارق مستمر

طيب حضرتك ليه ما اشتكتش الدكتور اللي عمل كده

اعمل ايه بس وسط د/ احمد اخويا يترجاني اني ماعملش حاجه ، وعرض مبلغ كتعويض ، اضطريت اني اخده علشان مصاريف العلاج اللي خلصت علي اللي قدامي واللي ورايا كمان ماقدرش ارفض طلب لدكتور احمد

بعدما مرت الازمه علي خير واستقرت الحاله علي هذا الوضع ، ولم يعد هناك اي امل في تحسنها اكثر من ذلك قرر الاستاذ صابر ان يعتزل الاطباء ويكون طبيب نفسه ،

وحتي لو اضطرته الظروف ان يذهب الي طبيب كان يمارس هوايته في قراءة النشرات اولا ولا يقبل اي دواء كتبه الطبيب الا بعدان يتأكد تماما منه ومن اعراضه الجانبيه

اما الجزء الاكثر مأساوية في حكاية الاستاذ صابر هوه مافعله اخوه الطبيب المشهور الذي اكل حقه في ميراث ابيه والقي اليه بالفتات مستغلا حاجته للمال ليوفر مصاريف العلاج واخرجه من شقته الي شقه حقيره في المساكن الشعبية بلا شفقه او رحمه وهو مازال في فترة النقاهة ، ثم رفض اكمال باقي المبلغ متعللا بضائقه ماليه يمر بها ،

كان موقف اخيه يضايقه كثيرا وكان يحكي لي
ما فعله به اخوه وهو علي وشك البكاء

باروحله بتنكر لي ومش بيرضي يقابلني ولا اكني اخوه ،
دا انا اخوه الكبير اللي تقريبا مربيه ،
مش عاوز منه فلوس انا عاوز بس يحسسني انه اخويا وخايف عليا وبيحبني زي ما باحبه


الي الآن مازال الجفاء مستمر بين الاستاذ صابر واخيه الطبيب المشهور ، وما زال الاستاذ صابر متمسكا بالامل في ربنا ، و مازال يمر يوميا ليسأل عن الجديد

ها يا دكتوره ....مافيش جديد ؟؟؟؟؟؟؟؟؟؟؟؟؟؟؟

-----------------------------------------------------------

بناء علي طلب باشمهندس عصفور المدينة


شخصيات الحكاية

الاستاذ صابر : البطل


دكتور سعيد : صيدلي تاني كان يعمل معي في الصيدليه


دكتور احمد : طبيب الاطفال المشهور اخو الاستاذ صابر



واي خدمة يا ابو يحيي :-)

ملحوظة / الاسماء اسماء مستعاره اما الحكايه فحيقيقة بتصرف بسيط



هناك ٤٤ تعليقًا:

الطائر الحزين يقول...

اقول ايه بس يا دكتورة

ماذا اقول وقد نزع الله الرحمة من قلب أخيه

لن يتخلى الله عنه

تحياتى

أم أحمد المصرية يقول...

تصدقي بدأت القراءة و انا فاكراها قصة طريفة بس زعلتيني في نهايتها علي الدنيا اللي فيها ناس من عينة اخوه

من القلب يقول...

سبحان الله
هو اشترى خاطر اخوه و قبل الرضا بما دمر حياته
و اخوه اشترى شهرته و برستيجه على حساب اقرب الناس له

فضفضة اوصيكى بالصبر معه و جعله الله لكى فى ميزان حسناتك

متغيرة شوية يقول...

مش عارفة اقول ايه

ربنا يصبره أكتر
ولا ربنا يجازي الدكتور اللي عمل فيه كده ويجازي اخوه

http://kasperb4.blogspot.com/ يقول...

انا اشتغلت فترة مع دكتور صيدلي معرفه كمساعد قبل ما ادخل الجامعة وعارف اد ايه المهنة دي محتاجة صبر في المعاملة مع الناس
يعني ربنا يكون ف عونك يا دكتورة بجد

وربنا يعافي الاستاذ صابر ويشفيه شفاء لا يغادر سقما هو وجميع مرضى المسليمن

وبالنسبة لحكايته مع اخوه انا شايف ان مش شرط يكون كل اللي بيحكيه عن اخوه هو الحقيقة المطلقة
ومش بقول انه بيكدب لأني مقدرش اسيء الظن
ولكن ممكن يكون ظروفه اللي بيمر بيها وانشغال اخوه عنه هو اللي مخليه حاسس بالجفاء ده من ناحيته وبالتالي الشيطان أدخل في قلبه الكره ناحية اخوه

مش عارف .. بس انا اتعلمت اني دايما ماخدش اي حكاية من طرف واحد بس
لأن في الغالب اللي بيحكي ده بيحكي من وجهة نظره هو وبس

ومعلش يا دكتورة انا طولت عليكي
بس ليا عندك عتاب صغير
بما ان الدكتور من أحد أشهر الأطباء في المدينة فمكانش من الضروري ذكر اسمه خصوصا بعد حكايته اللي اخوه حكاها عنه

دي وجهة نظري بس
وانا متأكد ان حضرتك هتفهميني صح ومش هتزعلي مني
:)

جمعاوى يقول...

ثبته الله

ورزقه الصبر

ريهام يقول...

السلام عليكم يا دكتورة الدكاترة طبعا حضرتك متعرفنيش لان دى اول مرة ازور مدونتك الجميله وعجبنى الموضوع جدا بتاع عم صابر وبجد ربنا معاه ويصبروا كمان وكمان على اللى هو فيه هى الدنيا كده ناس تغلط وناس تشيل ذنب ناس تانيه
مسلسل الاهمال الطبى مش جديد علينا ونفسى ان الناس دى تتقى ربنا شويه وزى مافى اطباء اكفاء فى كمان اطباء لايستحقول لقب طبيب اطلاقا ..
احييكى يا قمر على مدونتك الرائعه دى واتمنى تشرفينى بالذيارة فى مدونتى وتقوليلى رايك بمنتهى الصراحه وتاكدى ان اى نقد او كلام ليا هيكون فى مصلحتى وربنايوفقنا جميعا

اختك ريهام

د/اجدع بنوته يقول...

صابر فعلا وهو صابر

ربنا يعينه ويقويه

ويجازيه خير يااارب عن كل اللى شافه ده

فرنسا هانم يقول...

اللى عمله معاه الدكتور بتاع البنج ممكن يكون خطأ جسيم ولكن غير مقصود
اما
وما ادراك ما اما
اما اللى عمله اخوه افظع من فعله الدكتور
لانه فعل ما فعل عن قصد
حرام
حرام
حرام
يكون فى اخوات بالشكل ده

عاشــــــ النقاب ـقــــة"نونو" يقول...

انا بنتظرك دايما على طول الحياة يا دكتورة ما تتاخريش
لا حول ولا قوة الا بالله ربنا يعينه ويزيح عنه
ويحنن قلب اخوه عليه
الرحمة خلاص انتزعت
اصله لو يعرف قيمة الاخ الحنين ما كانش يعمل في اخوه كدة
حسبي الله ونعم الوكيل
تحياتي يا دكتورة

zordeak يقول...

لا حول ولا قوة الا بالله

صحيح اللى اتلسع من الشوربة ينفخ فى الزبادى

قلبى وجعنى وانا بسمع الحكاية

الدنيا بقت وحشة جدااااااااااا

الـسـيـدة نـون يقول...

الواحد لما بيتحط فى موقف وحش بيقول أخخخخخ
يعنى اول حاحد بيجى على بالنا هما الاخوات
وأستاذ صابر لو قال أخ الأخ هياكل حقه
معنديش تعليق اقوله
غير يارب ارحمنا كلنا
وازرع فى قلوبنا الرحمة
تحياتى يا فضفضة
اختك خيخة

عصفور المدينة يقول...

بارك الله فيك واعذريني للتأخير في الحضور لأن كانت بنتي بتعمل عملية والحمد لله أنني لم أقرأ قبلها وإلا كان زاد توتري

شكرا على إضافة مفتاح الخريطة
:)

أنا كدة فهمت كويس وبعدين أعتقد من سياق الحديث أن هذا الرجل أنت قابلتيه قبل أن تختمر فكرة المدونة في دماغك
قولي صح
:)

وبخصوص تعليق أخويا محمود(آمال وآلام)

فعلا معاه حق بس خبرة الحياة والله يا محمود خلت الواحد شاف النوع ده متكرر جدا وخاصة لو لقيت تفاوت كبير في الحالة المادية يؤيد الكلام وخاصة إذا كان الشخص الفقير يعني لا سلوكه منحرف ولا كدة يبقى غالبا كلامه صدق وإنه التاني مش له عذر يسيبه في الفقر والاحتياج كدة
عشان ماكنتيش حريصة على الاستماع له كثيرا في البداية

عمر محمود يقول...

أنا آسف للدخول بدون رد ولكن غدا الصيام والقيام والدعاء ضرورى

http://yalaya3mlak.blogspot.com/2008/02/blog-post_24.html
يوم الاثنين صيام وقيام

وانتظرونى بعد غد

Desert cat يقول...

لا حول ولا قوة الا بالله
مسلسل اهمال الاطباء ده مش حينتهى الا بوجود قانون حازم يحمى الناس
بالنسبة لأخو الاستاذ صابر الدكتور المشور فكل واحد عنده علة فى حياته بس بشكل مختلف

حل وسط يقول...

انا باتغم بشده لما القيني محتاجة دكتور
واحاول اكون طبيب نفسي زي ما حضرتك قولتي
واذا الموضوع زاد افضل اسال المجربين عن دكتور كويس وعنده قلب وضمير
تفتكري ليه؟
عشان نسبة الدكاترة اللي عندهم ضمير قلت قوي
وعشان كشف الدكاترة بقى غالي قوي

والمريض اللي ماعاهوش فلوس في البلد دي ربنا يكون في عونه وعون اهله

همس الاحباب يقول...

حكاية عم صابر حكاية ملايين البشر فى الوقت الحالى
اهمال من دكتور وما اكثر الاهمال فى وقتنا الحالى .
وطمع وجشع ونكران جميل من اقرب الاقارب اخوه وبرده ما اكثر الجشع ونكران الجميل .
اللهم ارحمناولا تؤاخذنا بما فعل السفهاء منا وثبته واجعله فى ميزان حسناته .
تحياتى دى اول زيارة للمدونة الرقيقة وسوف نتواصل باذن الله
خالد

الفقيرة إلى الله أم البنات يقول...

حسبى الله ونعم الوكيل
شئ موجع جدا"..ولكن للأسف موجود ومنتشر مثل الانفلونزا

بنت القمر يقول...

عجبني اوي تعليق فرنسا هانم

أم أحمد يقول...

بقي يدخل يعمل عملية بسيطة كدة يخرج بعاهة ربنا يصبره ويستر علينا

قبلة الحياة يقول...

بالبدايه اهنيكي على اسلوبك المميز والراقي في السرد والكتابه وربنا يوفقك دايما باذن الله

ثانيا انا بردو بيتهيأ لي اننا لازم نسمع من الطرف الآخر عشان يكون حكمنا موضوعي بعيد عن العواطف ..
ولو اني لم أعد أثق ان لسه في قلوب نقيه وطاهره وشفافه حتى لو كانت بين الاخوات الا من رحم ربي وهي حالات نادره
فالمادة مؤخراً تدخلت في صنع قلوب البشر ..
واصبحت الأرقام والحسابات وارصده البنوك هي المحرك الاساسي للنفوس
والقلوب التي ضاعت منها الرحمه ..

وبالنهايه ندعو الله الا يجعل حاجتنا الا اليه ويصبر عم صابر ويشفيه ويعينه ويعينك ويجزيك الله كل خير على طيبه قلبك ورقه مشاعرك

اللهم لا تجعل حاجتي الا اليك ولا تجعل أنسي الا بك
اللهم لا تجعل الدنيا أكبر همّنا ولا مبلغ علمنا

وصلى اللهم وبارك على محمد النبي الأمي وعلى آله وصحبه وسلم

اختي الفاضلة تقبلي تحياتي واحترامي ومروري

Soooo يقول...

لا حول ولا قوة الا بالله
امال تقولي ايه للي بيتخلو عن ابوهم بعد ما رباهم وصرف عليهم وجوزهم وجهزهم من كل حاجه حتى العربيه آخر موديل .. وجه عند اصغر واحد في ولاده وماعمللوش ولا حاجه من اللي عملها مع اخواته الكبار
وسبحان الله .. يمرض الاب ومافيش حد يقعد معاه ولا ياخد بالو منه غير ابنه الصغير اللي هو عمره ماحسسه انه ابوه ولا ساواه باخواته


قلبتي علينا المواجع والله يا دكتوره
ربنا يلطف بينا
ربنا يلطف





سلامووووووووز

kafrawy يقول...

ربنا يهدى الجميع

يادكتورة

الدنيا بقت صعبة مش صابر واخوة بس
كل يوم ف الالاف الحالات اللى زية او اسوا منة كمان
بتحصل بين الاخوات

الربان يقول...

تحياتي

اخطاء اطباء التخدير كثيرة...و انصح اي مريض بعدم اللجوء الي الجراحة حتي لو
كانت بسيطة الا اذا كان هذا هو الخيار الوحيد...

لابد ايضا ان نقول ان هناك نسبه متعارف عليها عالميا...يمكن ان يجدوا صعوبات في التخدير و الإفاقة.

تحياتي و تقديري و شكري علي الموضوع
لانني اعتقد انه مهم و يمس حياة الناس.

رينـــــــــــا يقول...

ان لله وان اليه راجعون
بالله دا اخ !!!!
انا اصلا مش بثق فى الدكاترة وبخاف جدا من موضوع الابر دى وتحديدا البنج
ربنا معاه ويشفيه ويعوضه خير يارب

مصعب رجب يقول...

على فكرة
الأستاذ صابر مش لوحده
فيه منه كتيييييييير قوي موجودين في كل مكان

البوست ده بيفكرني بمسرحين كان عملها طلاب التيار الإسلامي في جامعة المنصورة في التسعينيات كان اسمها ولاد الأبالسة
كان البطل الرئيسي في المسرحية : الأستاذ صابر غلبان على طول
وفعلا كانت ظروفه قريبة جدا من ظروف الأستاذ صابر بتاع البوست ده
جزاكم الله خيرا
والسلام مسك الختام

الراقـــص مع الذئـــــاب يقول...

السلام عليكم ورحمة الله وبركاته

كان الله في عون الاستاذ صابر
وربنا يهدي اخوه ويصلح بينهما

جزاكي الله خيرا يا دكتورة

حنان شلبي يقول...

سلام عليكم ازيك يا عسولة

معلش من زمان مدخلت عندك بس والله ظروف الشغل عندي صعبة

بس شو هالقصة جد بتوجع القلب , والله الواحد بطل يقدر يامن لاي دكتور بهالدنيا كلهم بلاستيك

الله يكون بعونو لصابر المسكين بالدنيا بس ان شاء الله بالاخرة الله بريحو وبرجعلو حقو تالت ومتلت

مع تحياتي
حنان شلبي

شريف طلال يقول...

هو ده الزمن ألى أصبح فيه الدم ميه
بعد ما كنا بنقول عمر الدم ما يبقى ميه
لا حول ولا قوه الا بالله
ربنا ان شاء الله مش هيتخلى عنه
و شكراً جداً لعرضك الموضوع بالطريقه المشوقه دى
تحياتى

كلمتى يقول...

السلام عليكم
دى اول مره ازور فيها مدونتك بس ان شاء الله الزياره هتكرر
اما بالنسبه للأستاذ صابر فربنا يصبره لأن اوحش شىء انك تجرحى من أعز الناس ليكى
اما اخوه فحسبى الله ونعم الوكيل

رئيس جمهوريه نفسى يقول...

حسبى الله ونعمه الوكيل يعنى اخوه باعه مرتين مره مع مجامله دكتور صديقه ومره فى ميراث ابيه

بنوته مصرية يقول...

حسبي الله ونعم الوكيل

له حق ميثقش في اي شخص

ده اخوه خانه مابالك الغريب

اخطاء الدكاترة كتيرة ربنا يستر علينا


لكي كل التحية واستحمليه

له عذرة فعلا
تحياتي
رودي

Unknown يقول...

اختى الفاضلة
هذه زيارتى الاولى لك وكم كانت سعادتى بما اطلعت عليه من قصة عمنا صابر
وان شاء الله سوف يتم شفاؤه طالما يثق فى الله وانه سوف يمن عليه بالشفاء ..اما اخوه لو هو انسان محترم كان وقف جنب اخوه وجاب له حقه مش يساهم فى ظلمه علشان خاطر زميل له
وحسبى الله ونعم الوكيل
-----------------------
اختى الفاضلة
انا من مؤسسى اتحاد المدونيين المصريين وادعوك للتواصل معنا من اجل اتحاد قوى يضم جميع مدونى مصر للعمل على تقنين حقوقنا وحماية المدونيين والرقى بعملية التدوين
فى انتظار تواصلك معنا على مدونة الاتحادhttp://egyptadwin.maktoobblog.com
------------------------
للعلم انا عملت هذه المدونة للتواصل مع مدونى موقع البلوج سبوت
فاتمنى مساعدتى للرقى بها
شكرا لكم مقدما

إخوانى مخربش يقول...

اللىنأح عليا فى القصة كلها

ان رغم ان اخوه متنكر منه وهو الكبير كمان

الا انه بقلب الاخ الكبير مثل قلب الاب تماما يريد ان يحنو على اخيه ولا يريد منه سوى فقط ان يظهر له اخوه هذا الحنان

سبحان الله

هى الدنيا جرى فيها ايه

غير معرف يقول...

القصة وان كانت مجرد قصة فهى تحدث فى الواقع باكثر ماساوية
نقدر ندرجها تحت القصص الخيالية لنهايتها السعيدة والبطل عاش ولو حتى كان مبيحركش غير صباع
الواقع امر من كده وربنا يستر علينا منه ومن امثال اخو صابر والدكتور

صبرني يارب يقول...

جزاك الله خيرا يا اختي الفاضله على صبرك معاه مع انه المفروض مش دورك كصيدلانيه وانما دور البهوات الدكاتره اصحاب المهنه الانسانيه فى المقام الاول .

المهنه الى اصبحت للاسفه مهنة متاجرة فىالمقام ا لاوحد عند اغلب الدكاتره .

انا قبل كده مع احترامي لكل الدكاتره قلتلهم فى احد المستشفيات الخاصه ( الى دفعت فيها دم قلبي ) الدكاتره دول احسن واحد فيهم يادوب هايقف على باب الجنه يشمها بس .

بجد اكتر فئه فيها ناس متعجرفه ومغروره ومتعاليه على الاخرين مش عارفه ليه
ودايما اقول لهم احقر تجاره فى الدنيا انك تتاجر بآلام الناس واوجاعهم .

وانا لو مكان استاذ صابر كنت قاضيت الدكتور ده والى يتشددله عشان ما يعملش كده مع حد تاني هو وامثاله وما يبقاش يضرب بانجو وهو رايح الشغل .
ما تستعجبوش والله العظيم الدكاتره في منهم بيتعاطى مخدرات وبيروح شغله وهسطول كمان . مش عارفه من فم زوجة دكتور أو بالاحرى طليقة دكتور .

أنا عن نفسي ابنى تعرض لمشكله فور تنشقه هواء الدنيا بسبب خطا دكاتره وممرضين ولو كنت عندي امل فى انى اثبت عليهم حاجه كنت قاضيتهم فعلا الا انه حالة ابنى كان صعب اثبات اهمالهم فيها لان كان فى احتمال 5% انه يكون اخذ العدوى مني انا اثناء الولاده مش من المستشفى
اسفه على الاطاله لكن ارجوكم ما تسبوش حقكم عشان الناس تحترمكم وتحترم حقوقكم وان ما كانوش الدكاتره يحترموا شغلهم ومرضاهم فيبقى يخافوهم بقى بدل ما الناس تضيع بالشكل المخزي ده .
وعلى فكره لو قعدت للصبح احكيلكم حكايتي مع الدكاتره تعرفوا ليه انا باتكلم كده فى الموضوع ده وشكرا لكم

خمسة فضفضة يقول...

السلام عليكم ورحمة الله وبركاته

الطائر الحزين

ان شاء الله لن يتخلي الله عنه
---------

ام احمد المصرية

آسفه اني زعلتك بس للاسف ساعات الحقيقه بتبقي مره

-------------

من القلب

بحاول علي قد ما اقدر اني اعامله بللين واصبر عليه
ربنا معاه

--------------

متغيرة شوية

ربنا يصبره وحقه لن يضيع عند الله

---------------
آلام وآمال

محتاجه فعلا صبر ايوب

بالنسبة لاخوه زي ما باشمهندس عصفور قال الشواهد اللي في الموضوع وسمعة اخوه في البلد وكمان التفاوت الفظيع في المستويين وبرضو تعامل اخوه مع الناس ومنهم زوجي اللي بيزوره بصفته مدير دعايه كل ده بيأكد ان كلام استاذ صابر صحيح
كمان هو ما حكليش الكلام ده الا بعد فتره ومش عاوز منه حاجه اصلا

ربنا يهديهوله

الاسامي اللي في الحكايه مستعاره وكمان في تعديل بسيط في الاحداث لا يخل بالحكايه الاصليه علشان برضو ما حدش يتعرف

--------------

جمعاوي

اللهم آمين

---------------

ريهام
اهلا بيك هنا ويارب دايما ،
ربنا يخلصنا من الاهمال اللي فيكل حته ويصبر عم صابر

انا رايحه عندك اهه

----------------

د/ اجدع بنوته

الله آمين ، شفتي الدكاتره بيعملوا ايه في الناس :-)

----------------------

فرنستي الغاليه

للاسف فيه اخوات زيه كتير اوي بيبقوا جاحدين لاخواتهم ، والعيب في الاصل علي التربيه اللي بتميز اخ عن التاني وما بتزرعش الحب في قلوب الاخوات ناحية بعض

منوراني يا غاليه

---------------------

nonoym

اللهم آمين
ان شاءالله مش هاتاخر ، بس والله فجأة باكتشف انه فاتت فتره طويله ، بس اوعدك مش هاتأخر

منوراني

--------------


zordeak

دا ينفخ في الميه الساقعه مش الزبادي
سلامة قلبك يا دكتور ، ابقي خد بالك من العيانين

--------

بت خيخه

اللهم آمين ويرحمن ا جميعا ويحنن قلب اخوه عليه

نورتيني

-------------

باشمهندس عصفور

مافيش اعذار بين الاخوا يا فندم والف سلامه علي الاموره بنت حضرتك

طلبات حضرتك اوامر

ابطال كل الحكايات قابلتهم قبل ما افكر في المدونه ولما كترت الحكايات جتني فكرة المدونه
اما استاذ صابر هوه اصلا اللي ماكانش مديني فرصه ولا كان بيرضي يتعامل معايا اصلا ولا يحكيلي وكل شويه يقلي الدكتور سعيد عارف الحكايه

لحد بقي مالقاش الا اني فقرر انه يحكيلي

وكلامك لمحمود صح فعلا وده اللي قلتهوله في ردي عليه

نورتني

خمسة فضفضة يقول...

السلام عليكم ورحمة الله وبركاته

عمر محمود

ربنا يفك اسرهم

-------
قطة الصحراء

للاسف الاهمال في كل حته مش في المجال الطبي وبس ، ولكن الغلطه في الطب ممكن تموت بني آدم

حسبنا الله ونعم الوكيل

--------------

حل وسط

ربنا يتم عليكِ نعمة الصحه ويغنيك عن الدكاتره

----------

همس الاحباب

اللهم آمين
نورتني في اول زياره ويارب دايما

-------

ام البنات

ربنا يهدي الجميع

-------
بنت القمر

شفتي بس للاسف ممكن اخوه مايكونش حاسس بحجم الجرح اللي سببهوله

منوراني

---------

ام احمد
اللهم آمين

------------

قبلة الحياة
اللهم آمين

شكرا علي ذوقك

ممكن تقري ردي علي آلام وآمال وكمان الرد بتاع باشمهندس عصفور المدينه هايوضحلك كتير

----------

سووووووو

معلش قلبت عليك المواجع

الابن ده لازم يحاول انه يلتمس اي عذر لابوه لانه في الاول والآخر ابوه
ويحتسب تعبه معاه اثناء مرضه عند الله اللي هايعوضه خير من الدنيا ومافيها ان شاء الله

نورتني وعاوزين نشوفك في خمسه فضفضة
سلاام
----------
كفراوي

اللهم آمين
ربنا يهدينا اجمعين

--------

الربان

للاسف الاهمال كتر اوي بين الدكاتره
ربنا يسترها مع الجميع

----------

رينا

يارب اللهم آمين
ربنا يمتعك بالصحه يا رينا وغنيكِ عن الدكاتره

---------

ابو اسامه

منورني ،الاستاذ صابر في كل حته مع اختلاف ظروف الحكايه

ربنا يصبر الجميع

نورتني
--------------

الراقص مع الذئاب
وعليكم السلام

اللهم آمين

---------------

حنان شلبي

وحشاني جدا ، انا اللي آسفه اني بقالي كتير مازورتكيش

منوراني

---------

شريف طلال

شكرا علي ذوقك
ان شاء الله ربنا هايقف معاه وياخدله حقه سوا دنيا او آخره

نورتني

------------
كلمتي

منوراني لاول مره ويارب دايما

-------------

خمسة فضفضة يقول...

السلام عليكم ورحمة الله وبركاته

رئيس جمهورية نفسي

كتير اوي من الناس اليومين دول بقت اسهل حاجه عندهم انهم يبعوا اي حاجه ان شاء الله اقرب الناس ليهم ومش مهم بكام

---------

بنوته مصريه

والله باستحمله وباخده علي اد عقله في حاجات كتير
ربنا يتم شفاه

------------

استاذ حسن توفيق

احييك علي اتحاد المدونين المصريين مجهود رائع يستحق الاشاده
ربنا يوفقك وتحقق كل اللي تتمناه

نورتني

------

اخواني مخربش

الناس بقي كل همها ازاي تجمع فلوس اكتر وباي طريقه حتي لو بالتجني علي اقرب الناس
حسبنا لله ونعم الوكيل

-----------
هنادي
القصه دي واقعيه بحصلت فعلا س فيه قصص امر من كده ميت مره

ربنا يسترها معانا ويطلعنا منها علي خير

نورتني
-----------
صبرني يارب
كلامك صحيح ميه في الميه ، خصوصا اللي يتعلق بالمستشفيات الخاصه
حسبنا الله ونعم الوكيل
ربنا ان شاء الله هاياخدلك حقك منهم
بس بلاش نقول مش هايشموا الجنه ،احنا مانعرفش ربنا هايغفر لمين ويعذب مين
ربنا يحسن خاتمتنا جميعا

منوراني

تحياتي

Doba يقول...

لا حول ولا قوة الا بالله
ولله الامر من قبل ومن بعد

هبة

ayar يقول...

اللى حكتيه دا حال اغلب الناس .. احنا نفسنا قرايبنا لما كان ربنا مديهم كانوا ولا يعرفونا ولما الزمن جيه عليهم .. افتكرونا وبقوا حبايبنا ومحتاجين لنا كمان .. بس احنا طلعنا احسن منهم ..

ربنا مبيسيبش يادكتورة .. داين تدان ولو بعد حين ..
سلامى ليكى

koukawy يقول...

حقيقي اللي بيشوف بلاوي الناس بتهون غليه بلوته

LOST يقول...

مساء الخير يازمل

الحكايه دي مؤثره قوي....واخوا الطبيب ده ماعندوش قلب....
المهنه دي بتحطنا في مكان توقيع مآسي الناس ومشاكلهم...
عايزه اقولك اني حابه المواقف اللي بتحكيها وخصوصا ان دي اول سنه شغل ليا

لو بتحبي الشعر والخواطر...زوريني.

غير معرف يقول...

al7amdu lilah ..................