السبت، ١٩ يناير ٢٠٠٨

وسط العتمه ضي

عرفتها لاول مره عندما جاءت تشتري بعض الادوية ومستحضرات التجميل ،واخذت تتحدث مع زوجي بطريقه توحي معرفتها به مسبقا ، بعد انصرافها قال لي

انتِ مش عارفه دي مين ؟؟؟؟ دي مدام سلوي مرات الباشمهندس عمر عبد ربه، ساكنه في البيت اللي قدمنا ده ، تبقي اخت احمد شتا

عائلة احمد شتا من اغنياء المدينه فهم من كبار تجار الفاكهه بل ويحتكرون تجارة الموز ، كما انه -احمد- كان زميل زوجي في الدراسه حتي الثانوية العامة وكثيرا ما اشترينا منه فاكهه رائعه منتقاه علي الفرازه "معرفه بقي "

بحكم الجيره كانت مدام سلوي تمر عليّ يوميا لتشتري احتياجاتها احيانا ، او لترغي فقط في كثير من الاحيان

عرفت منها انها تخرجت في كلية الآداب قسم علم نفس وتعمل اخصائية نفسيه في المدرسة الاعدادية القريبة ، كما انها متزوجه منذ ثمان سنوات ولم ترزق بعد بأولاد

والله يادكتوره لفيت ودخت انا وجوزي ومافيش فايده ،كل واحد يعد يجرب فينا شويه ،لحد ما زهقنا وقرفنا ، وملينا من كتر الانتظار والامل الكداب اللي كل دكتور يعشمنا بيه وفي الآخر ننزل علي فاشوش

و كثيرا ما كان ينتهي حديثها بدموع تأبي ان تفارق مقلتيها او حتي بالبكاء الحار

ما تزعليش يا مدام سلوي والله فيه ناس بيقعدوا بال 15 والعشرين سنه في الآخر ربنا بيرزقهم ، ماتفقديش الامل دا ربنا كبير ، بس انتِ ما توقفيش الدعاء ابدا والاستغفار

وعندما توطدت علاقتنا اكثر فتحت لي قلبها اكثر واكثر وباحت لي عن السبب الاصلي لتكدير حياتها


ونعم بالله ، والله انا عارفه ومش فارقه معايا العيال من عدمهم بس المشكله في جوزي هوه اللي هايتجنن ، وليل ونهار بيعايريني ويهددني انه هايتجوز عليا مع ان كل الدكاتره قالوا ان احنا الاتنين زي الفل والتأخير من عند ربنا

عرفت منها ان زوجها وهو مهندس كبير في المجلس المحلي من عائله فقيره او لنكن اكثر دقه تحت خط الفقر ، ولولا مجانية التعليم - علي ايامه طبعا- ما استطاع ان يكمل دراسته ويصل لهذا المنصب ،وكذلك جميع اخوته وصلوا لأعلي المناصب و في اماكن مهمه

اما اسرتها بالرغم من الثراءالفاحش الا ان اسلوب حياتهم لم يتغير منذ ان كان الاب يعمل علي عربة يد وتسيطر عليهم اخلاق البيئة التي تربوا فيها ، كما ان التعليم يأتي عندهم في المرتبة الثانية او الثالثه ان لم يكن في الرابعه ، واقصي ما وصل اليه احدهم هي الثانوية العامة او حتي دبلوم التجاره ، وسلوي الوحيده التي حصلت علي شهاده جامعيه ، كما انها لا تتمتع باي قدر من الجمال ، بل لنقل انها دميمه الي حد ما

دايما يعد يعايرني باخواتي وطريقة عيشتهم وازاي مش قادرين يتأقلموا مع الوسط الجديد اللي بقوا فيه ، وطريقة كلامهم واسلوبهم في التعامل ، علي طول يقولوي اخواتك دول بيئة

كان ايضا ياعيرها بدمامتها ويقارن بينها وبين اخوته البنات ، وكثيرا ما كانا نسمع اصوات صراخ تخرج من شرفتهم التي تطل علي الصيدليه لتأتيني في اليوم التالي بعين متورمه او وجه ازرق من اثر الضرب ، كما كنت اراها تنتظره لساعات متأخره بعد منتصف الليل في طقس شديد البروده


وطبعا لا يخفي علي احد انه لم يتزوجها الا لمال ابيها و ميراثها المنتظر منه ، وجاء تأخر الانجاب ليزيد الطين بله و يتفاقم الوضع بينهما ويصل لهذه الدرجه المترديه

كانت تعيش حالة من الترقب، كانت تعرف بأن هناك صفعة مؤلمة ومفاجئة وغير متوقعة قادمة، ولكنها لا تعرف متي.. ؟؟ لذلك كانت تسعي بشده للحصول علي طفل ، جربت كل الطرق بداية من الطرق الطبيه و حتي الوصفات الشعبيه

خلاص يا دكتوره قررنا اننا نعمل عملية تلقيح صناعي ، قالنا عليها دكتور كبير اوي في مصر هانعملها ان شاء الله الشهر ده وهابقي اجيلك تديني الحقن ادعيلي ربنا يوفقني ده الامل الوحيد

وللاسف اجرت العمليه ولكنها باءت بالفشل ليزداد الوضع سوء بينها وبين زوجها ، ويقرر بعد تحريض من اخوته البنات ان يتزوج باخري تنجب له الولد الذي يتمناه، مما وصل بسلوي الي حافة الانهيار فهي تهيم به عشقا


أصابتها حالة من الذهول والصدمة والانكسار ، و أخذت تتضرع الي الله كثيرا ان ينقذها مما هي فيه، اعتزلت العالم واعتكفت في بيتها لا تقوي علي الخروج ، انقطعت عني اخبارها لمده و اعتقدت انها غادرت المنزل الي بيت ابيها

بعد عدة اسابيع جائتني وقد اشرق وجهها من الفرح

باركيلي يا دكتورة

خير يامدام سلوي ايه خلاص جوزك صرف نظر عن فكرة الجواز

لأ ..حاجه ولا في الحواديت

خير فرحيني معاكي

انا حامل في شهرين

الف الف مبروك ، مش قلتلك ولا تقنطوا من رحمة الله

بدون اي مساعده طبيه وبعد ثمان سنوات من العناء حملت سلوي ابنها الاول يوسف الذي اكمل الآن عامه السادس ، ثم بعده ب3 سنوات انجبت يارا

صحيح مازالت العلاقه بينها وبين زوجها يشوبها بعض التوتر ولكن يوسف ويارا ساعدا كثيرا علي تهدئة الاجواء


هناك ٥٤ تعليقًا:

عصفور المدينة يقول...

سبحان الله
ربي قدير

أعلم أن الرغبة الشديدة في الحمل تكون سببا في تأخره وأيضا الخوف الشديد منه


دكتورة لدي اقتراحان
الأول أن تجعلي عدد التدوينات في الصفحة تدونتين

الثاني طلب غريب شوية نفسي تحطي في أول القصة أو آخرها ملخص الأسماء والشخصيات
يبقى زي مفتاح الخريطة
يعني مثلا
سلوى : زوجة عمر أخصائية نفسية
عمر :زوج سلوى مهندس في المجلس المحلي
أحمد شتا : أخو سلوى وزميل زوجي

أصلي باتلخبط في الأسامي
:)

خمسة فضفضة يقول...

السلام عليكم ورحمة الله وبركاته

طبعا باشمهندس عصفور ، ماشاء الله ، يارب سباق الي الخير دايما

فعلا القصه دي بتبين قدرة ربنا الخلاق العظيم علي كل شئ واذا اراد شيئا ان يقول كن فيكون
كمان الواحد رزقه معروف بس هو اللي بيستعجل

وفعلا الترقب كل شهر والقلق والتوتر بيؤدي الي عدم انتظام التبويض وعدم حدوث الحمل
ربنا يرزق كل مشتاق

---------
بالنسبه للاقتراحان اوك ياباشمهندس ماقدرش ارفض لحضرتك طلب ، انت بس تاشر واحنا ننفذ
ولاون الشخصيات يعني مش كتير

اه صحيح ماقلتليش رايك في الحكايه يعني طويله ،ممله ، اسلوبها اخباره ايه ، اختصر شويه ولا طولها كده حلو ؟؟؟

عصفور المدينة يقول...

الأسلوب رائع والشخصيات فعلا مش كثير بس أنا عندي مشكلة في ذاكرة الأسماء عشان كدة طلبت الطلب الكمبيوتري ده
زي مفتاح الخريطة لكن رائعة
أحسست أنك تعطي التفاصيل في الوقت الذي أتوقعه فعلا أو أتساءل عنه أجدك تجيبين عنها

محمد عبد الغفار يقول...

ثراء ثراء ثراء

هو شعورى بعد نهايه قرأتى هنا

خمسة فضفضة يقول...

السلام عليكم ورحمة الله وبركاته

باشمهندس عصفور
شكرا لحضرتك بس برضو ماقلتش طويله ابقي اقصر الحكايه شويه ولا كده كويس

ان شاء الله من المره الجايه ابقي احط الخريطه اللي حضرتك عاوزها

خمسة فضفضة يقول...

السلام عليكم ورحمة الله وبركاته

محمد عبد الغفار

ههههههه

متشكرين علي كل الذوق ده ، وربنا يزيدك ثراء علي ثراء

نورتني

موجة يقول...

انا كنت زعلان في الاول انك كتبتي البوست في مدونة جديدة
بس لما دخلتها حسيت بانها مختلفة عن خمسة فضفضة
و لما قريت البوست بدات اتاكد ان على طول الحياة غير خمسة فضفة
رغم ان القلم واحد لكن الروح مختلفة
ربنا يوفقك
خالص تحياتي

Memo يقول...

السلام عليكم ورحمة الله وبركاته
الحكاية تحفة و بجد ارجوكي ارجوكي ارجوكي تكتبلنا منها تانييييييييييييييي

Unknown يقول...

سبحان الله قادر على كل شئ .. أفن يجيب المضطر إذا دعاه ويكشف السوء .. أإله مع الله؟

لا اله الا الله

جزاكى الله خيرا على الحكايات الجميلة دى يا احلى دكتورة
:))

Desert cat يقول...

" ويرزقكم من حيث لا تعلمون "
حقا
ان الله مع الصابرين
حتى يا دكتورة لو زوجها ما زال بيعاملها وحش
فيوسف ويارا اضاؤا حياتها
ربنا يبارك لها فيهم ويجعلهم قرة عينها

mohand يقول...

السلام عليكم

فكرتيني بكلمة جدتي الله يرحمها

جالي الولد ظهر اتسند

سبحان الله
يهب لمن يشاء


القصة كويسة والاسلوب رائع
واستمري حضرتك

مهندس مصري بيحب مصر يقول...

ربنا يبارك لها فيهم و يهدي سرهم
بس زعلت من الحتة دي

وكثيرا ما كنا نسمع اصوات صراخ تخرج من شرفتهم التي تطل علي الصيدليه لتأتيني في اليوم التالي بعين متورمه او وجه ازرق من اثر الضرب ،

الراجل اللي يضرب مراته بدون مصيبة فظيعة أصلاً ما يبقاش راجل محترم
ثم الضرب للناشز لو نشزت و انا مش شايف كده من حكايتك
الضرب الشرعي للناشز لا يكون إلا بعد الوعظ و الهجر في الفراش
و الضرب يجب ألا يكسر عظماً و لا يخدش لحماً و لا يكون في الوجه

أي رجل هذا الذي يضرب زوجته إنه ليس برجل :(

مصعب رجب يقول...

السلام عليكم ورحمة الله وبركاته
مبدئيا : المدونة ممتازة والقصة رائعة وتحمل أكثر من معنى

تحمل معنى الصبر على قضاء الله
وتحمل معنى الأخذ بالأسباب
وتحمل معنى حسن العشرة بين الأزواج
وغيرما من المعاني

لذلك أقول وبثقة : جزاكم الله خيرا

ولكن لي تعليق بسيط على هذه الجملة :

الف الف مبروك ، مش قلتلك ولا تقنتوا من رحمة الله

الآية بهذا الشكل غير صحيحة والنص الصحيح للآية في سورة الزمر هو :
قل يا عبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا .

ملحوظة صغيرة :
تقنتوا : من القنوت بمعنى الدعاء
تقنطوا : من القنوط بمعنى اليأس

جزاكم الله خيرا
وأتمنى أن أرى تعليقا لك على تدوينتي بخصوص ما يحدث الآن في غزة وأتمنى أن أرى لك تدوينة قريبا تتحدث عن هذا الآمر .
والسلام عليكم ورحمة الله وبركاته

خالد حفظي يقول...

لا أجد
ما أقوله
أشعر بالعار يلفني
يشل يدي
و يعقد لساني
صدقوني
ما تمنيت الموت غير اليوم
يااااااارب
إقبضنا إليك غير خزايا ولا مفتونين
........................
صائم حتى يرفع الحصار عن غزة

شاب نفسة يحقق حلمة يقول...

سبحان الله
هي دي الحاجه اللي ممكن تتقال علي الحكاية دي
بس بجد ان مش متخيل ازاي قدرتي تغيري فكرك في المدونتين
خمسة فضفضة تختلف عن دي خالص بجد ابدعتي
تحياتي ليكي يا دكتورة

بنت الصالحين يقول...

رووووووووووووعه

بتحصل قدامي كتيير
سبحان الله لو الناس تعرف تبطل استهبال وتخلف

سبحان الله ربنا هو اللي بيرزق
ماكانش لهم نصيب يخلفو دلوقتي ايه الدنيا جري فيها ايه

وبعدين بتبقي اصعب للست عن الراجل
حلم حياه الست هما الاطفال
بدل مايقف جنبها يعمل كده

حسبنا الله ونعم الوكيل

وبعدين انا مع مهندس مصري في اللي ضايقه


يضربها

لا حول ولا قوه الا بالله



اللهم رحمنا برحمتك

Ma 3lina يقول...

ربنا يكرم كل المتزجوين بالخلفة الصالحة باذن الله

دكتورة عندى استفسار

هوا لازمة موافقة الناس اللى بنكتب عنهم قبل ما ننشر اصلى فى يوميات صيدلى تعرضت لمواقف بينى و بين المساعد فمش عارفة لازم اقولو يعنى و لا عادى ؟؟

شقاوة شعب يقول...

سبحان الله
اذا اردا شئ يقول له كن فيكون

تابعوا معى احداث غزة
"مصر تؤكد على دعمها للاغاثة باعتقال الزعفرانى"

تحياتى
شيماء

يا مراكبي يقول...

فعلا .. ما الدنيا إلا مسرح كبير

قال تعالى: لله ملك السموات والأرض

يهب لمن يشاء إناثا ويهب لمن يشاء الذكور

أو يزوجهم ذكرانا وإناثا ويجعل من يشاء عقيما

lonely يقول...

هذه هى ضريبة زواج المصالح
او الزواج لاى اعتبارات اخرى غير الود والتفاهم والانسجام
هل لو كانا زوجين متفاهمين كانت ستسير القصه على هذا المنوال
لا اظن

اعلم كثيرات لم يرزقهن الله بنعمة الاطفال نهائيا
ولاسباب ترجع لهن
وتعامل اففضل معامله من زوجها ولم يفكر ولو للحظه فى ان يتزوج باخرى

وفى النهايه فان ارادة الله نافذه
لو نعلم هذا ونتيقن منه لما خوفنا ولا انتظرنا ولا حزنا
ولكنها النفس البشريه اللحوحه القليلة الصصبر
تحياتى

خمسة فضفضة يقول...

السلام عليكم ورحمة الله وبركاته

موجة

ربنا يخليك متشكره اوي علي ذوقك

ربنا يوفقنا اجمعين

تحياتي

خمسة فضفضة يقول...

السلام عليكم ورحمة الله و بركاته

ميمو

ايه النور دا كله
ربنا يخليكي علي لكلام الجامد ده ، ان شاء الله هايبقي فيه من دا كتير

منوره

الـسـيـدة نـون يقول...

اختى فضفضة
بصى اولا هل دى فعلا اسماء حقيقية
ارجو انه يكون لأ
ثانيت طبعا الحمد الله ان ربنا كرمها
ولو انى مش مقتنعة ان سلوى تستحمل اهانات جوزها ليها لدرجدة توصل للضرب والمعايرة
انا كان عندى انها تنفصل عن جوزها قبل موضوع العيال ده حفاظا على كرامتها
دى وجهة نظرى الشخصية
يغور الحب اذا كان معاه قلة قيمة
بس خلاص
ربنا يكرم الناس كلها
ويدي كل عايز عيال يديهم عيال
سلام
اختك خيخة

AHMED SAMIR يقول...

سبحان الله
دائما ربنا سبحانه وتعالى بيجعل بعض الناس ايات يستدل بيها ناس تانية
وعلى الرغم من سعادتي بانفراج ازمتها
الا انها لم تنفرج كليا
من الواضح ان زوجها شخصية غير سوية وبالتالي ليس من المنتظر ان ينصلح حاله
تحياتي

kafrawy يقول...

_بعد السلام يا دكتورة _

القصة دى بتفكرنى سناء جميل و صلاح منصر ف فيلم الزوجة التانية ع ما اتذكر كان برضة عايز يجيب الولد
انا صرحة مش عارف لية الناس مش بترضى اللى يقسمة ربنا سواء فية اولاد او مفيش بس اللى انا شايفة ف القصة دى
ان الطمع هو برضة شىء ف نفس الانسان
بدليل ان جوزها اتجوزها ع الفلوس و كمان بيعايوها و الاكتر انة عايز يجيب عيال منها
يعنى عايز كل حاجة من الدنيا من غير ما يعطى اى حاجة
او ياخذ منة حاجة او ع الاقل معاملة طيبة مع زوجتة

غريب طبع البنى ادمين

Unknown يقول...

ازي حضرتك يادكتوره
والله فعلاان مع العسر يسرا وربنا كريم ويرزق من يشاء ولكن الانسان دائما عجول 0ولو نلاحظ دائما اقترن اسم الله الضاربالنافع لاينفرد احدهما عن الاخر وذلك لان الله يضر لينفع ويمنع ليعطي سبحانه وتعالي ولعل في الخلفه او المال او غيره بلاء وسوء فيمنع الله لينقذ عبده
علي العموم ربنا يرزقنا ويمن علينا
وجزاكم الله كل خير
ولاننسي الدعاء لاهل غزه

عصفور المدينة يقول...

السلام عليكم
الدكتورة ماعلينا بخصوص موافقة الشخصيات على الحكاية فيه عناصر مؤثرة في الموضوع

-هل أنت أصلا شخصية معروفة بحيث الناس الذين يقرؤون سيعرفون بالتبعية الشخص الذي تتكلمين عنه وهذا يكشف تفاصيل عنه ويشهر به
في هذه الحالة ستكون الكتابة غيبة ولكن في حالة أنك غير معروفة أو معروفة ولكن وريت عن الشخص بحيث لا يعرف فهذا سيكون مثل قول النبي صلى الله عليه وسلم مابال أقوام يفعلون كذا

- الهدف من الحكاية لابد أن يكون هناك هدف من حكاية المواقف وفائدة بحيث لا يكون الأمر مجرد تسلية

- التفاصيل المروية في القصة تكون على قدر الهدف

- ذكر الجانب الطيب في الشخص الذي تحكي عنه من قبيل الإنصاف

أعتقد أن الدكتورة فضفضة أوضحت مثال عملي لكل هذه النقاط في هذه المدونة

فرنسا هانم يقول...

ازيك يا دكتوره
وحشانى
انتى عارفه طبعا انى غبت 3 ايام لوجودى فى القاهره
علشان كده انا متاخره عليكى
المهم
القصه جميله جدا جدا
وفيها توفيق من الله عز وجل لتلك السيده
لان حملها جاء فى وقت مناسب جدا
وعلى راى الشاعر
ولما ضاقت حلقاتها فرجت وكنت اظنها لن تفرج

خمسة فضفضة يقول...

السلام عليكم ورحمة الله وبركاته

انسانه

جزانا واياك يا يويو
ربنا فعلا قريب مجيب
" ادعوني استجب لكم "

نورتيني

خمسة فضفضة يقول...

السلام عليكم ورحمة الله وبركاته

قطة الصحراء
صدق الله العظيم
ربنا يقر عينيها بيهم ويعوضها بيهم عن سوء المعامله

اللهم آمين

خمسة فضفضة يقول...

السلام عليكم ورحمة الله وبركاته

مهند تاني

ربنا يخليك يا مهند علي ذوقك

وربنا يرزق كل مشتاق

تحياتي

خمسة فضفضة يقول...

السلام عليكم ورحمة الله وبركاته

مهندس مصري

كلامك طبعا لا خلاف عليه ، بس فيه رجاله كتير اوي انعدمت عندهم الاخلاق وبيضربوا زوجاتهم بطرق وحشيه اقلها الضرب علي الوجه

ربنا يهديهم ويهدينا اجمعين

خمسة فضفضة يقول...

السلام عليكم ورحمة الله وبركاته

ابو اسامة

ربنا يكرمك كلك ذوق

جزنا الله واياكم

شكرا علي التوضيح وتم تصويب الخطأ


تحياتي

خمسة فضفضة يقول...

السلام عليكم ورحمة الله وبركاته

وطني

كلنا نشعر بالعار والمهانه ولا نجد ما نساعدهم به الا الدعاء والتضرع لله ان يفك اسرهم ويفرج كربهم
والحمد لله دلوقتي تقريبا انفك الحصار وتم تزويدهم بمايحتاجون من اساسيات الحياه

نورتني

خمسة فضفضة يقول...

السلام عليكم ورحمة الله وبركاته

شاب نفسه يحقق حلمه

طبعا سبحان الله ، الحياه مليانه بقصص من دي كتير اللي يدقق فيها يري كتير من المعجزات اللي الواحد بيقف قدمها عاجز الا عن انه يقول سبحان الله

بالنسبه للمدونتين
شوف حضرتك :
هناك في فضفضة دي انا د/ فضفضة دا اللي بحس بيه وبللي بيبقي طالع من جوايا انا مش حد تاني

اما هنا انا مجرد راوية لقصص وحكايات الناس اللي مروا عليا واللي يمكن اكون سمعتها منهم شخصيا او عشتها معاهم او حتي اتحكت لي من ناس تانيه غيرهم
يعني مجرد سرد لاحداث بتحصل او حصلت كل اللي بعمله اني باصيغها باسلوب ينفع الكتابه ويكون بعيد عن الملل والتطويل

علشان كده فيه فرق في روح المدونتين


منورني دايما

Abd-Alrahman يقول...

حكاية جميلة جدا جدا
بوست شيق جدا
شكرا اختي الجميلة علي الكلام الجميل

soma يقول...

سبحان الله القادر على كل شىء

بس بجد اى أنسانه عاقله فى موقف زى دا كانت لازم تنفصل عن شخص قبيح ودميم الطبع زى دا...على رأى الكاتب مصطفى محمود(أنجو بجلدى ولو بسلخ جلدى) ربنا يعافينا دمامة الطباع وغشاوة الابصار

أحمد سلامــة يقول...

انا عشت الحالة دي يا دوك بردو بس في البين اللي قصادنا مع فارق بسيط
هو ان الزوج كان في منتهى الانسانية والرقه مع زوجته وتحمل بدل الثمان سنوات حوالي 20 سنة
منذ كنت طفلا
وقد رزقه الله بطفل وطفلة بعد 24 عام تقريبا من المعاملة الحسنة والعيش بالمعروف مع شريكته ونصفه الاخر
:)
ويما على طول الحياة بتلاقي
احييكي على العنوان بشدة

عاشــــــ النقاب ـقــــة"نونو" يقول...

يا سبحانك يا رب ربنا يهدي سرهم يارب
يلا انا منتظرة الجديد دائما
مدونتك دي بالذات بحبها جدا جدا
متتاخريش بقى
دمتي بكل الخير

ياسر مدني ...دينامو الإخوان يقول...

بعد طووووووووووووول غياب
الحمد لله عودة للتدوين عبر دينامو الإخوان

أتمني التواصل بلا إنقطاع

الراقـــص مع الذئـــــاب يقول...

السلام عليكم


سبحان الله العظيم

والله موضوع مؤثر جدا ...بس قدرة ربنا فوق كل شئ


تسلم ايدك يا دكتورة

Nagdi يقول...

i am waiting?????

Nagdi

Arabia يقول...

سبحان الله

انا شوفت مواقف كتير برضه زى دى

جزاكى الله خيييير

مدونتك رائعه

سعيد شحاتة يقول...

جميل والله
الفاكهة بتاعة جماعة شتا لذيذة والموضوع جمل
تحياتى

dina يقول...

بجد دا ايه دا...سبحان الله فعلا ربنا كرمه كبير و فتاح و فتحه دايما بيكون خيالى بجد

عروسة ننوسة يقول...

موضوعك حلو كتير ومفيد اتمنى منك عرض كثير من الحالات المشابهة....الله قدير على كل شىء

خمسة فضفضة يقول...

السلام عليكم ورحمة الله وبركاته

عاشقة الفردوس

لو يعرفوا قيمة الدنيا صح ومعني لقدر ، ومعني قدر الله وماشاء فعل ماكانوش فعلا يعملوا كده

--------------

دكتورة ماعلينا
اللهم آمين
بالنسبة للسؤال باشمهندس عصفور رد عليك ياريت تتكرمي وتقري كلامه

-------------

شقاوة شعب

فعلا سبحان الله بمشيئته تتم الصالحات



نورتوني

خمسة فضفضة يقول...

السلام عليكم ورحمة الله وبركاته

يامراكبي

صدق الله العظيم
للاسف الناس بيقروا الآية دي ومش بتمر علي قلبهم بتمر بس علي ودانهم

انا جعلنا علي قلوبهم اكنة ان يفقهوه

------------------------


lonely
عندك حق
اي زواج مصلحه لازم ينتهي بمصيبه دا من وجهة نظري



تحياتي

خمسة فضفضة يقول...

السلام عليكم ورحمة الله وبركاته

خيخه

لا يا ستي الاسماء مش حقيقيه بس الحكايات حقيقية مع تعديل بسيط عشان مايتعرفوش كمان

اما بالنسبة للطلاق ، الطلاق ده مش حاجه سهله زي ما انت متخيله لا ابدا ، مافيش اي واحده مهما كان مستواها المادي ولا العلمي سهل عليها انها تحمل لقب مطلقه وتشوف نظرات الناس ليها واللي دايما بيحملوها هي السبب حتي لو كان جوزها هو اللي غلطان

والله العظيم اعرف ستات مستحملين اكتر من كده من اجوازهم وعمرهم ما فكروا في الطلاق ابدا لاسباب كتير من ضمنها كمان العيال ، واعرف ستات اجوازهم هما اللي مش بيخلفوا وبرضوا عمرهم ما فكروا يطلقوا
الطلاق ابغض الحلال ربنا يكفينا شره


تحياتي يا قمر

خمسة فضفضة يقول...

السلام عليكم ورحمة الله وبركاته

د/ احمد سمير

ربنا سبحانه وتعالي كريم ورحيم بعباده ،
ربنا يهديلها زوجها

--------------
كفراوي

في ناس زيه كتير ، عاوزين يحصدوا من غير ما يزرعوا

ربنا يهديهم

---------
الفاتح الجعفري

صدقت ، فعلا الله رؤوف بعباده ورحيم بهم

جزانا واياك كل الخير

-------------

فرنسا هانم

ازيك يا خالتو عامله ايه
الحمد لله اللي فرج همها
ربنا يفرج هم الجميع يارب


منوريني جميعا

خمسة فضفضة يقول...

السلام عليكم ورحمة الله وبركاته

باشمهندس عصفور
جزاك الله خيرا علي التوضيح

LOST يقول...

دي ثمار الصبر

وربنا يهدي جوزها على قد مابتحبه

عايزه اقولك ان حكاياتك بتأثر وبتعلم كتير وصحيح اللي يشوف بلاوي الناس تهون عليه بلاويه

خواطر ليست عابرة يقول...

حكاياتك دروس في الحياة التي لا تنتهي دروسها أبدا

سيدتي

أشكر لك حكمتك في تخير موضوعاتك بعناية

أعتقد أن القلق والحالة النفسية غير المستقرة سبب مشاكل صحية كتير في حياتنا

خواطر ليست عابرة يقول...

آه نسيت نفسي بأة حد يكون أخصائي نفسي يقوللي ممكن الواحد يحب بنت زي أخته ولا دي أوهام؟